Paléographie & Généalogie

Aulne quarree, ou aulne en quarré, est le mesurage de l'aulne en tous sens, c'est à dire en long, et en large, et non en long seulement, Vlna quaquauersus ducta, vel prorsum deorsumque directa. De laquelle façon de mesurage sont aulnées les tapisseries de haute lice. Bailler à aucun tout du long de l'aulne, est une maniere proverbiale de parler, usitée par le François, semblable à cet autre de mesme livrée, Je luy ay baillé toutes ses façons, quand il veut dire qu'il n'a laissé rien en derriere pour bien travailler aucun. Car ces manieres de parler se prennent tousjours en mauvaise part, et par indignation. Comme si l'un de deux plaidants menaçoit sa partie de la bien chicaner, et promener en procez, luy diroit, Je vous en bailleray tout le long de l'aulne: ou, Je vous bailleray toutes vos façons. Nihil molestiae taediique reliquum faciam, ita te misere litigando pessundabo. La premiere maniere de parler est prinse de l'aulnage, lequel est tout à bout, quand l'aulne entiere y est: et la seconde, du labourage des terres et vignes, qui consiste en trois ou quatre façons, lesquelles leur estans entierement baillées, elles sont tout à bout cultivées.

 

Srce : Nicot, Thresor de la langue française (1606)